الثلاثاء، 4 أغسطس 2020

وصلت رسالة جديدة - قصة رعب قصيرة

البوست دة كان على صفحة صديق ليا من كام يوم.. الصديق دة اختفى يوميها ولحد دلوقتي مش عارفين راح فين
....
النهاردة حصل الآتي : جت لي رسالة على التليفون من رقم غريب بتقول " احنا شايفينك " .. بحثت عن الرقم لقيته مش متسجل بأي اسم .. حتى مش سبام. حاولت أطنش الرسالة و بعد ساعتين جت لي رسالة تانية من نفس الرقم بتقول " لازم تخاف " . وقتها قلت لا بقى .. جربت اتصل بس طلع الرقم غير موجود في الخدمة
خفت ... فضلت قاعد ساكت بفكر في الرعب اللي حصل.
مكدبش عليكم .. كنت كل دقيقة بلف في الشقة كلها وانا لوحدي .. بتأكد أن مفيش حاجة.
قعدت اقلب شوية على الفيس .. بقلّب بس .. متوتر .. قلبي مقبوض.
جت لي رسالة تالتة .. فتحتها.
" احنا قدام الباب "
بصيت ورايا لباب اوضتي مفيش حد.
قمت وخرجت وانا ركبي بتخبط في بعضها ورايح عند باب الشقة.
وانا في الطريق جت لي رسالة ..
" متحاولش تبص لإنك مش هتشوفنا "
خدت بعضي وجريت على اوضتي. قفلت باب اوضتي بالمفتاح وقعدت وكتبت البوست دة ..
لو حد شاف البوست يساعدني يقول لي اعمل ايييه مع اني بجد حاسس أنهم جوة الشقة دلوقتي.
مش سامع خطوات بس حاسس بوجودهم. فيه ريحة وحشة جداا في كل مكان دلوقتي.
كلموا اهلي لاني مش هلحق أكلمهم.
بابا : 010XXXXXXXX
ماما : 011XXXXXXXX
.....
البوست خلص. الصديق دة اختفى فجأة. محدش كان مصدقه في الكومنتات .. التعليقات كلها فاكراه بيهزر باعتبار أنه اصلا كان عمال ينشر بوستات رعب هزار.
بس لما اختفى يومها من ٣ ايام بالظبط .. أصحابه وعيلته اللي دخلوا ملقهوش ولقوا البوست اترعبوا. موبايله كان موجود بس مش عليه رسايل خالص.
الموضوع مخيف طبعا .. الفكرة اني قعدت ادور لقيت ان فيه حول العالم مواقف مشابهة حصلت فعلااا.
السؤال .. راحوا فين ؟ مين خطفهم ؟
هل مخلوقات فضائية زي ما المواقع بتقول ؟
ولا جن ؟ ولا مخلوقات تانية ؟؟!
-تمت-
هيثم_ممتاز

الجمعة، 12 يونيو 2020

بؤس - سيناريو قصير

دة سيناريو قصير كنت كتبته في 2016 فقلت أشاركه معاكم ^_^
"بؤس"
Fade in
م: ن/د
((غرفة نوم))
صفحة رئيسية عبر موقع "الفيس بوك" ..تحرك سريع بالماوس يظهر على الصفحة فلا تستقر على صورة أو بوست أو فيديو..إنه "خالد" الجالس على سريره في الغرفة المظلمة واضعاً اللاب توب على فخذيه فلم يظهر من الغرفة سوى ضوء الشاشة وجزء بسيط من جسد "خالد" ووجهه.
يتوقف عن النظر إلى الصفحة المفتوحة ..ينظر أمامه ثم ينظر إلى الشاشة حيث صفحته الشخصية ويكتب
"يسكن روح إبن آدم وليس جسده .. إنه الشيطان "
في منشور ويضغط على نشر .. يطول نظره إلى شاشة اللاب توب بإستغراب شديد.
خالد
غريب !
يفرك بجسده على السرير ..يضع اللاب توب بجانبه ثم يتنهد ...
م: ن/د
((ممر الشقة))
يمشي "خالد" ناظراً إلى الأرض ..ثم يتأمل ضوء الشمس البسيط الذي يتخلل من مكان ما على الحائط ,ثم يعود وينظر إلى الأرض ويكمل سيره.
م: ن/د
((الحمام))
يدخل "خالد" ويقف أمام الصنبور ..ينظر له بإستياء ثم يفتح الصنبور فتنساب المياه يأخذ القليل من المياه ثم يمسح بها وجهه.
م: ن/د
((المطبخ))
يقف "خالد" ويعد لنفسه سندوتش ..ثم يأكل أول قضمة وهو يسير في أنحاء المطبخ.. يترك السندوتش ويضعه على المنضدة في المطبخ ويخلع التيشيرت ويخرج.
م:ن/د
((مكتب العمل))
"خالد" جالس على مكتبه بملابسه الرسمية ..وأمامه كمبيوتر العمل مغلقاً ..وأمامه على المكتب أوراق كثيرة عليه مراجعتها وتسجيلها .يدخل "عم رؤوف" بصينية الشاي الفارغة ..والمنشفة الموضوعة على كتفه .
عم رؤوف
أحلى صباح على أحلى
أستاذ خالد ...
ينظر "خالد" له في وجوم ...
عم رؤوف
أعمل لك القهوة بتاعتك ؟
خالد
هي الساعة كام ؟
ينظر "رؤوف" إلى الساعة على معصمه .
عم رؤوف
كام إيه يا أستاذ خالد
دة إنت لسة جاي ..
يتركه "عم رؤوف" ويخرج ..ينظر "خالد" إلى الباب المغلق ..ثم ينظر إلى الساعة المعلقة أمامه على الحائط وعقرب الثواني ينتقل ببطء .
م:ل/د
(( غرفة نوم))
يدخل "خالد" الغرفة المظلمة ..يفتح النور ..ضوء اللمبة خافتة , يذهب إلى السرير ويرمي نفسه عليه.
م: ل/د
((غرفة نوم))
يستيقظ "خالد" ويفتح عينيه فيجد نفسه ينظر إلى اللمبة الخافتة التي أخذت ترتعش ثم إنطفأت ..ينظر إلى الظلام أمامه .
صوت الآذان
الله أكبر .. الله أكبر
أشهد أن لا إله إلا الله ....
يخرج "خالد" الموبايل من بنطلونه ..فيظهر ضوء الشاشة ينعكس على جزء من وجه "خالد" .
يقوم "خالد" ليجلس على حافة السرير.. ثم يقوم ويضع الموبايل في جيبه ويخرج.
م:ل/د
((الحمام))
يتوضأ "خالد" فيرن الموبايل ,يخرجه من جيبه ..ويرد.
خالد
مين ؟ ...إييييه ؟؟
يترك "خالد" الصنبور والوضوء ثم يجري خارج الحمام.
م:ن/خ
((الطريق الصحراوي))
أضواء الفجر تظهر ..تقف سيارة "خالد" ثم ينزل مفزوعاً ..يدور حول نفسه ..الطريق خالي من أي حوادث ! فقط السيارات تجري .
يخرج موبايله ثم يتصل.
خالد
إنت فين ؟؟! ... في
البيت إزاي ؟؟؟ مش
إنت كلمتني وقلت لي
إنك عملت حادثة ؟؟!
....... ألو ألو ألووو
ينظر "خالد" إلى هاتفه ..ثم يلتفت حوله مرة أخرى ..يسرع نحو السيارة ويركبها ويمشي.
م:ن/د
((غرفة نوم))
يدخل "خالد" غرفته ويرتمي على السرير واضعاً يده على وجهه ..ينظر إلى ساعته ثم يخلع الساعة ويقف ..ينظر إلى السرير ثم يرتمي عليه مرة أخرى.
م: ن/د
((غرفة نوم))
يتقلب "خالد" في فراشه ..فتح عينيه المغلقتين نصف فتحة ..أخرج الهاتف من جيبه ثم نظر ليجد الساعة (( 12:00 ظ )) ووجد رسالة مرسلة وبضعة مكالمات فائتة ..ضغط عليها وفتحها لتظهر رسالة من مديره فقام "خالد" مفزوعاً
" إنت مبتردش ليه على التليفون بتاعك ..وليه مجتش النهاردة ؟ مخصوم منك 4 أيام يا خالد عشان تبقى ملتزم بعد كدة "
وضع "خالد" الهاتف بجانبه على السرير وزفر زفرة سريعة وسحب الموبايل وقام ذاهباً نحو باب الغرفة.
م: ن/د
((الصالة))
يخرج "خالد" من الحمام مبللاً بالمياة واضعاً الهاتف على أذنه ويقف ..
خالد ((لمديره))
ألو ... والله راحت عليا نومة
وإمبارح حصل شوية حاجات
كدة ... إسمعني بس ..
(صارخاً) إنتوا ليه مش مقدرين
الزفت اللي أنا فيه ؟؟؟ عايز تخصم
إخصم ..عايز ترفدني عاادي جداً
أنا خلااااااص .........
ثم أغلق "خالد" الهاتف في وجهه .
صوت جرس المنزل
يذهب "خالد" ناظراً إلى الأرض ..وفتح الباب ليجد عامل توصيل لمطعم ما .
العامل
مساء الخير ؟
خالد
خير ؟
العامل
حضرتك طلبت بيتزا ؟؟
خالد
مش ناقصاك خالص
العامل
أسف يا فندم
أغلق "خالد" الباب ..ورمى الهاتف بعيداً .
م: ن/د
((المطبخ))
يجلس "خالد" أمام المنضدة وأمامه طاسة بيض مقلي وخبز وجبنة وبجانبه فنجان القهوة ..يأكل في شراهة ..يسحب لقمة ويضعها في فمه ..يرجع بظهره إلى الوراء ويقوم تاركاً الفوضى ويخرج من المطبخ.
م: ن/د
((الصالة))
يجلس "خالد" على الأريكة واضعاً اللاب توب على ركبتيه ويتابع قاطباً حاجبيه موقع الفيس بوك ...يقطب حاجبيه أكثر حتى يظهر الغضب على ملامحه .
ينظر طويلاً إلى شاشة اللاب توب ..ثم يغلق شاشة اللاب توب ويتنهد تنهيدة طويلة.
م: ن/د
((غرفة النوم))
يدخل "خالد" الغرفة نحو السرير ويجلس على السرير ويغطي نفسه ويضع اللاب توب بجانبه على الكوميدينو وفوقه الهاتف ويغمض عينيه ...
م: خ
((أي مكان ما ))
الخلفية سوداء والأرضية سواء ..يقف "خالد" بملابسه السوداء وعلى ملامحه الحزن ..يلتفت حوله في جنون.
خالد
إيه ؟ إييه ؟ إييه ؟ إييه ؟
(صدى الصوت)
إيه ؟ إييه ؟؟
يستمر في الدوران ....
م :ل/د
((غرفة النوم))
يقوم "خالد" فزعاً من كابوسه غارقاً في العرق ..ينظر أمامه طويلاً ..يأخذ الهاتف من فوق الكوميدينو وينظر إلى الساعة..
(09:10 PM)
يهز رأسه ..
-عدة لقطات متتالية -
"خالد" ماسكاً للهاتف غاضباً ويصرخ في وجه مديره.
"خالد" يقف في مكان الحادث ولا يرى شيئاً .
شيطان يقف وينظر إلى "خالد" ضاحكاً .
"خالد" يترك الوضوء في الحمام ويجري للخارج .
-نهاية اللقطات-
يزيح "خالد" نظره من على الهاتف ...يشمر يديه ليقوم ثم يجلس .
خالد
الله غفور رحيم
يصمت قليلاً ثم يهز رأسه في يأس.
يسحب اللاب توب من جانبه ويفتحه ...
الآن في صفحته الشخصية نرى حروف يخطها "خالد" تتكون .
" الإله الذي لا يرحم عباده لا يستحق عبادته أليس كذلك ؟ "
بدأ يمسح تلك الحروف حرف حرف ..يتنهد وينظر إلى شاشة اللاب توب طويلاً ...
خالد
فين الرحمة ؟؟ فين دي ؟!
Fade Out
#هيثم_ممتاز